【Emily】謝偉俊：未聞立會擬准視像開會
[2021.06.19] 發表
【明報專訊】立法會議事規則委員會早前通過修訂《議事規則》，如果立法會流會，議員無合理理由缺席，就要罰款。政府將修改《立法會(權力及特權)條例》以配合罰錢，有傳媒引述消息話政府將一併修改特權法，賦權立法會以遙距視像方式開會，甚至用人面識別喺大會投票。不過，議事規則委員會主席謝偉俊(Paul)噚日就話，無聽聞會對修改特權法准遙距開會同投票，如有修改要經委員會討論，但委員會無討論過。
內會主席李慧琼上周五喺內會報告與政務司長張建宗會面，話政府為配合施行對議員嘅財政處分措施，準備提交法案修改特權法，爭取8月內提交，務求本屆立法會完成修例。
Paul噚日同Emily講，大會點樣表決，《基本法》有規定，如果有特定情况可遙距形式進行，有呢個可能性、彈性係好事，但未睇法律上係咪可行。佢又話，係有議員想探討，但未必係再擔心有會議被搗亂，而係喺天災人禍發生時用。
鄭松泰話投票事關體統
熱血公民鄭松泰話，立法會大會通過嘅法例有法定效力，無理由用視像處理，呢個唔係單純嘅技術或法律問題，而係政治上對社會影響大，係體統問題。佢又反問：「如果咁都改得，使乜要立法會大樓？」
更多港聞
相關新聞
