【Emily】鄒家成獄中畫自嘲熊 Gary畫高達渣古

鄒家成日前由獄中寄出「自嘲熊（jokebear）」畫作。（鄒家成facebook）

【明報專訊】民主派初選案36人已還押兩月，勝出新東初選嘅鄒家成，日前由獄中寄出畫作。佢畫咗近日年輕人之間非常流行嘅「自嘲熊(jokebear)」，並寫上「持續奮鬥的人」、「不被監獄吞噬的人」字句，寄語縱使每日要面對不公不義嘅事、要埋頭於忙碌生活，都唔好忘記每日保留靜下來嘅時間，同自己好好相處。佢嘅facebook小編就話，睇嚟鄒家成喺獄中不知不覺已培養出畫畫嘅興趣，相信佢正一步步向住偉大畫家嘅夢想進發。

新民主同盟呂文光就話早前收到黨友范國威(Gary)寄出嘅畫作，同助理討論時，由不同角度睇，話有人睇到海浪、有人睇到峽谷，問大家睇到啲乜。Gary一向係畫畫高手，佢早前就童心大發，畫咗「高達與渣古」，唔少網民大讚好靚。

阿臻：Benny曬黑咗結實咗

此外，佔中9人案上訴噚日被駁回，案中被告之一、立法會前議員邵家臻話對佢而言，去法庭時見到港大法律學院前副教授戴耀廷(Benny)都好重要，形容Benny曬黑咗好多，常跑步同做sit up、明顯結實咗，個樣都十分精神。阿臻話，知道Benny喺獄中勤讀聖經，寫講道講稿、梳理信仰反省，形容Benny比我哋想像更強大。