【Emily】美芬「留學每周一浴經歷」勉年輕人

【明報專訊】建制派近月積極拍片同網民交流，經民聯梁美芬噚日喺facebook做直播，話知道時下年輕人身處大時代有好大壓力，唔少人抱怨現狀，對社會不滿，所以佢想分享人生經歷，例如細個「一粒糖紙當玩具」、去北京讀中國法律時「一個星期冲一次涼」，勸勉年輕人要樂觀積極，反問：「當你抱怨社會之前，有冇呢啲經歷呢？」

梁美芬自稱細個經歷絕不順利，讀中學時曾患病，「一個禮拜要睇3次物理治療」。佢話當年物質生活無現時咁豐裕，冇玩具就玩「糖紙」、「石仔」，「但我哋創新喎！由『零』去作啲遊戲出嚟，咪一樣咁過」。

梁美芬又話，當年去北京讀書係專登逆流而行，「人人都去英國美國嘅話，我去北京唔係更好咩，我起碼係少數」。佢話留京生涯一啲都唔舒服，除咗每月僅得75人民幣外匯券，亦由於佢頂唔順一星期只可冲一次涼，因此試過「跌到隻腳去睇跌打睇咗3個月，都要學識踩單車」，「零下10度踩單車去澡堂(冲涼)」。

梁美芬又話自己當年即使「上咗車」，仍然「賣埋間樓」去創業，將中國法律翻譯做英文，再推出銷售，「掘到第一桶金」，連美國大學都訂佢嘅出品。