【Emily】停課不停唱 中學用Zoom搞歌唱比賽
[2020.04.13] 發表
【明報專訊】疫情期間唔少學校都用視像會議軟件Zoom上堂，何明華會督銀禧中學最近就用呢個軟件搞咗場校內歌唱比賽。統籌比賽嘅學生會主席楊澍鏗話 ，停課令唔少校內活動舉行唔到，為咗畀同學有機會參加一年一度嘅比賽，喺中學生活留低一啲回憶，就喺今個月3號搞咗一場Zoom歌唱比賽。
令中學生活留低一啲回憶
楊同學話持續停課下，同學喺屋企除咗網上學習，無乜其他活動，而疫情遲遲未減退，學生會希望舉辦活動畀同學參與，老師就建議搞網上歌唱比賽，參加者喺屋企現場清唱。
之前無學生會舉辦過類似活動，起初籌備嗰陣，楊同學都覺得無從入手，但喺老師協助下，短短兩個禮拜就預備好所需器材同完成宣傳，舉行一場網上直播歌唱比賽。
網上比賽同現場唔同，學生會要準備直播器材，又可能有技術問題。但楊同學話唔少人都係喺中學嗰陣，第一次參加歌唱比賽，如果今年學生會唔搞比賽，中五同學到出年就忙於準備公開試，無時間參加，所以佢都好想為同學繼續舉辦。
反應熱烈 30參賽名額近滿
同學普遍對比賽反應熱烈，30個參賽名額幾乎滿晒，睇直播嘅學生高峰時超過100人。楊同學話當日比賽決定出10個決賽席位，現時希望疫情完結，等同學7月可以喺學校見面，並且有機會聽到晉身決賽嘅同學現場演唱。
更多港聞
【明報專訊】土瓜灣馬頭圍道首置上車盤「煥然懿居」月底落成，市建局行政總監韋志成噚日喺網誌話，「煥然懿居」採智能技術，因應項目有唔少開放式同1...
詳情
相關新聞
