【Emily】葉劉立會人工減一成 田二少減薪三成至疫情結束
[2020.04.10] 發表
【明報專訊】疫情令經濟環境非常嚴峻，林鄭班子同行政會議成員宣布會減薪一成，為期1年，噚日亦有唔少機構宣布高層會減薪以共渡時艱，外界關注立法會議員又會唔會跟隨呢？立法會、行會「雙料議員」葉劉淑儀噚日就首先表明，立法會份糧亦會自行減薪一成至任期完結，即9月底，佢話會將呢嚿錢捐出嚟，暫未研究畀咩機構。
立法會議員現時月薪約10萬元。葉太話，立法會議員都係公職人員，應該共同表達與市民共渡時艱；被問到領導班子減薪係咪減得太遲，佢同意如果早啲、主動啲更好，但政府有很多考慮。
實政圓桌田北辰亦承諾捐出薪酬資助基層上網，佢話會減三成人工至疫情完結，估計疫情大約仲要維持4個月，「4個月嘅三成，就等於12個月嘅一成(人工)」。
民建聯「積極考慮」 叫泛民共渡時艱
其他政黨方面，民建聯梁志祥噚日話該黨「積極考慮」，如果減唔到，亦會考慮捐出部分人工支持抗疫工作。民建聯噚日亦喺facebook出post，話該黨議員3月份已率先捐咗300萬支援失業家庭，表明「我們期待泛民立法會議員與市民共渡時艱」。
AY：唔會將錢畀番庫房 捐黃圈
公民黨黨魁楊岳橋(AY)就話，如果大家覺得有需要，佢哋都會用捐嘅方法，目標係幫助黃色經濟圈，但強調唔會減薪，唔會將錢「畀番庫房、畀警察打人」。民主黨胡志偉日前亦話資源會用於支援抗爭者。
更多港聞
【Emily】陳振彬獲提名港鐵獨董 有望年袋36萬
【明報專訊】近年經歷不少風雨嘅港鐵（0066），董事會上年開始大洗牌，包括主席馬時亨、獨立董事石禮謙及鄭海泉等都先後卸任，港鐵噚日宣布將於5... 詳情
【明報專訊】公民黨立法會議員陳淑莊早前同幾十人喺一間落半閘嘅酒吧開會，被質疑違反「限聚令」，風波未止，41名建制派議員噚日發表聯署聲明，要求...
詳情
相關新聞
