梁富華贈親著工運史 遭林鄭原書打回頭

[2018.10.06] 發表

【明報專訊】工聯會會長吳秋北早前批評法官，畀特首林鄭月娥不點名作「遺憾」之後，工聯會前副會長梁富華前排就成立咗個名為「擁北個人小組」(「擁北者」)嘅小組，仲係上月底去特首辦示威，話要聲援吳秋北、抗議特首咁話，點知當日梁富華一見到林鄭，就由示威變咗同佢握手。

唔知係咪要為咗進一步顯示誠意，梁富華早前就將自己今年7月出版的工運大作《工人、工會、工棍之我見我評》(圖)，寄咗去特首辦，希望林鄭拜讀，對佢呢個工運界老手多啲了解。點知，特首不單止無睇，仲將本書連埋一封回函寄返畀佢。

Emily望過特首辦封信，措辭好有意思，信中開頭先多謝梁富華贈書，但就解釋指因為行政長官的身分唔可以接受餽贈，「有拂美意」，所以將本書還返畀佢，「好讓你與其他人士分享」。

回信最後仲同梁富華講，如果日後有好書推介，可以直接同特首辦講，「避免寄贈」，特首辦會「考慮另行購買」。

對於點解要辜負人?一番美意，特首辦回應查詢時就話解釋，行政長官一般唔接受或保留任何禮物。

更多港聞

【明報專訊】又到咗家長為仔女報幼稚園嘅季節，雖然唔少學校都可以網上或郵寄申請，但部分有名氣嘅幼稚園仲會要求指定日子親身交表，搞到家長需要排長... 詳情

【明報專訊】唔少市民參觀立法會大樓時，都會順道購買紀念品，立法會紀念品店近期完成裝修工程大變身，亦將會推出更多新產品，第一批就係由行管會同香... 詳情