【明報專訊】土地供應專責小組主席黃遠輝(Stanley)素有「公職王」稱號，噚日下晝寫咗篇「主席隨筆」，分享佢上個禮拜三嘅「典型」日程，朝早先去尖沙嘴以主席身分主持博物館諮詢委員會會議，下晝就去金鐘同某政黨嘅青年委員就土地供應交流，之後去灣仔接受電視台訪問，傍晚再趕去廣播道出席電台節目，全日走足4場。
Stanley話，佢傍晚6點做完訪問喺灣仔嘅天橋見到長長人龍，先至醒起係書展開幕，去到港鐵灣仔站月台等咗兩班車，喺金鐘站又等多5班車，先好似「沙甸魚」咁擠入車廂，仲被市民認出話佢坐港鐵「好貼地」。
之後佢又遇到大塞車，5分鐘嘅車程，足足走咗30分鐘，去到電台時節目都開始咗，令佢明白「土地問題」幾咁嚴重。Stanley話，如果土地供應充足，就可以加建或擴闊道路，減少塞車，否則做唔到基建先行，更莫講話宜居城市啦。
