【明報專訊】邊個政府部門咁大膽，約咗議員見面竟然「放飛機」？本身係註冊社工嘅工聯會勞工界立法會議員陸頌雄噚日主動同記者講，原本前日(25日)同十幾個社工喺立法會同教育局副秘書長同總教育主任會面，希望反映「一校一社工」政策對非學位社工嘅影響，點知教育局「甩轆」，去到未見影之餘，打電話亦無人聽，佢之後聯絡政治助理施俊輝，先得悉原來局方以為係噚日(26日)會面。

不過，事件似乎出現羅生門，教育局回覆Emily就話，有電郵紀錄為證，雙方應?噚日(26日)下晝5點半見面，從來無改變，不存在「局方甩轆」之說，教育局仲話會再次安排會面。

陸頌雄就同Emily講，今次事件係口同鼻拗，佢話助理同教育局約日子時，局方不止一次喺電話口頭確認係25號見面，所以佢哋mark實日子之餘亦約埋班社工，點知局方後來電郵則係寫26號。

教育局副局長蔡若蓮噚日得悉事件，亦主動打畀陸頌雄，叫大家唔好拘泥呢次小誤會，會盡快再安排會面。

運房局回信寫錯「郭永鏗」

另一邊廂，運房局同議員聯絡時就真係甩轆，公民黨郭榮鏗(Dennis)噚日喺facebook上載運房局回覆佢嘅信件，但就寫成「郭永鏗」，Dennis話「我幾時改咗名自己唔知？」