【明報專訊】為配合瑪麗醫院重建，有59年歷史、戰績彪炳嘅香港大學病理學樓完成歷史任務。拆卸在即，港大微生物學系講座教授袁國勇噚日首次對外揭開實驗室面紗，喺度工作31年嘅袁教授話，「所有重要發現都喺呢度發生」，又話「唔到你唔捨得，咩都會老」，佢𠵱家反而好期待新實驗室嘅「新玩具」。 59年歷史病理學樓將拆卸 大樓設有生物安全第三級實驗室，入面有數以千計嘅白兔、小鼠等，房門外有紅色玻璃隔絕刺眼嘅光線。袁教授解釋話，老鼠鍾意黑暗環境，有如身處洞穴先有安全感，佢又話長期困住小鼠可能會令佢哋緊張，所以房內係長期播放古典音樂，希望紓緩佢哋嘅情緒。 見證發現SARS元兇 袁國勇自1987年起喺病理學樓工作，佢話「所有重要發現都喺呢度發生」，包括發現SARS疫症「元兇」。袁教授話實驗室有多重防護措施，每樣離開實驗室嘅嘢都要經過30分鐘、120℃高溫消毒，工作人員就要冲涼。佢話擔任港大微生物學系主任時正值SARS襲港，有段時間佢經常發夢嚇醒，擔心實驗室流出病毒。Emily仲發現實驗室有關公坐鎮，佢企咗喺一堆雜物上面，混亂中不失氣勢！袁教授即刻話唔關佢事，係其他同事擺放嘅。唔知其他人係咪都同教授一樣發噩夢，要靠關公定一定驚呢？
|
| |
| |
;){kind=small}
