【明報專訊】噚晚世界女排聯賽香港站係中國隊對意大利隊，民建聯立法會議員劉國勳係女排紛絲，親身觀戰，仲同中國女排前隊長魏秋月合照。劉國勳喺facebook透露，有好友知道佢鍾意中國女排，特別送咗個有中國隊教練同球員簽名嘅排球畀佢。

有朗平簽名 同魏秋月趙蕊蕊合照

唔少建制派立法會議員呢幾日都有入場觀戰，民建聯張國鈞前晚同太太、兩個千金都有入場，為中國女排打氣，仲見證中國隊橫掃日本隊3比0。

劉國勳喺facebook「曬命」，話好友送咗一個有中國隊教練同球員簽名嘅排球畀佢，上面有埋朗平嘅簽名，可惜就無年初退役嘅國家隊前隊長惠若琪嘅簽名。

劉國勳噚晚又去觀戰，就撞到中國女排前隊長魏秋月，佢話魏秋月親身嚟香港站為隊友打氣；夜晚又再出相，同高佢成個頭嘅球員趙蕊蕊合照。