【明報專訊】民主思路喺去年成立「香港政治及行政學苑」，仲同港大專業進修學院(HKU SPACE)合辦「資深行政人員文憑(政治領袖)課程」。民主思路召集人湯家驊(Ronny)噚日同傳媒茶敘，分享課程成果，包括有學生會加入政府嘅「高層次委員會」。課程將會喺6月舉行畢業典禮，但Ronny話無錢請保安員，所以畢業禮無法邀請特首林鄭月娥出席，但就有邀請政務司長張建宗。 近日發生「許智峯事件」，令大家都討論政府「狗仔隊」嘅做法，Ronny呼籲大家唔好叫人「狗仔」，覺得係貶義。佢憶述11年嘅議員生涯之中，只有一次喺立法會大樓內畀政府人員問佢去邊，佢當時笑笑口無答，認為無必要講自己行蹤，「但田少(自由黨田北俊)有個好經典嘅回應：『我老婆都未問我去邊』」。 Ronny話，民主思路課程搞得幾成功，當中有3至4個學員會加入政府嘅「高層次委員會」，但唔方便講詳情。另外有2個學員有意參加2019年嘅區議會選舉。不過，Ronny話兩人都唔會以民主思路名義參選。 「香港政治及行政學苑」首屆課程將會喺6月舉行畢業典禮，林太曾經任開學禮嘉賓，但Ronny話上次請林太出席活動，民主思路要自行負責保安，仲用咗幾萬元，喺資源緊絀下，今次無法邀請林太。
|
| |
| |
