【明報專訊】立法會一地兩檢條例草案委員會進入逐條審議階段，會議室內泛民同委員會主席葉劉淑儀，以至泛民同建制派之間不時爆發罵戰，噚日更兩度因為爭拗要暫停會議。工聯會麥美娟噚日主動見記者，話被新民主同盟范國威誣衊佢喺會議室講粗口，叫范國威向佢及工聯會道歉；范國威就話麥美娟喺會議室內講咗個「超」字，睇番前文後理，用個「超」字同講粗口冇分別，所以唔會道歉。

話「超」係粗口 麥稱被誣衊

麥美娟話，噚日因為泛民同主席葉太有爭拗，佢喺暫停會議期間，企圖說服大家達成共識進入逐條審議，但當同大部分同事傾得掂之際，范國威突然誣衊佢講粗口。佢認為呢個指控非常嚴重，而在場都冇人覺得佢講粗口。佢話范國威為拖延審議草案無所不用其極，對此覺得非常遺憾同失望。

范國威就反駁，喺會議室用「超」呢啲粗俗字眼係唔恰當，又話既然麥美娟唔覺係粗口，夠唔夠膽喺傳媒面前講多次。