【明報專訊】立法會審議一地兩檢草案嘅法案委員會噚日開會，好多議員都關注，如果有人提出司法覆核挑戰一地兩檢，政府會點處理。運輸及房屋局長陳帆(圖)喺回應議員問題期間，一度話香港係「三權分立」，即刻畀委員會主席葉劉淑儀話佢搞錯憲制概念，話香港係「司法獨立」至啱。 噚日係委員會第三次審議一地兩檢方案，唔少議員都關注大律師公會向立法會提交嘅意見，指一地兩檢無憲制基礎，強調立法會無權制訂違反《基本法》嘅法例。公會又認為，人大嘅決定並不等同釋法，唔構成《基本法》嘅一部分，全國人大常委會亦都要遵守《基本法》。 大律師會﹕一地兩檢無憲制基礎 民主黨議員尹兆堅就問，如果法庭受理針對一地兩檢嘅司法覆核，政府喺通車等安排上有無「Plan B」，陳帆回應時話「我哋明白香港係三權分立嘅」。葉太即刻打斷局長，話「我哋唔係三權分立，呢個係憲制嘅point，係司法獨立」。陳帆最終都認同咗係「司法獨立」，又強調政府覺得𠵱家嘅方案合乎憲法同《基本法》，暫時都無「Plan B」。 全國人大委員長張德江舊年5月喺北京出席《基本法》實施20周年座談會，已經話《基本法》規定嘅政治體制唔係「三權分立」，而係「行政主導」，呢種說法喺香港引起爭議，而終審法院首席法官馬道立2015年曾經講過香港係「三權分立」，唔知局長比較認同邊個嘅觀點呢？
|
| |
| |
;){kind=small}
