【明報專訊】教育大學校董會主席馬時亨噚日接受民主黨前主席劉慧卿嘅網台節目《議會內外》訪問，席間談及律政司長鄭若驊嘅僭建風波。馬時亨話相信司長目前可能會有舉步維艱嘅感覺，寄語佢繼續努力，希望可以功大於過翻到身。

稱仙股事件難與僭建相提並論

卿姐引述行政會議成員李國章話，馬時亨因為2002年任財庫局長時發生嘅「仙股事件」，曾令民望大挫，但馬為官時整體表現非常好，指最重要係睇鄭若驊能否維護香港法治。馬時亨笑言「仙股事件」同僭建風波難以相提並論，因為前者係處事手法問題，後者係個人事件。

馬時亨話，當年自己剛上任財經事務及庫務局長時，民望得30幾分，但離任商經局長時就有60幾分。卿姐就叫佢畀啲貼士𠵱家嘅官員，有咩方法令民望反彈。馬時亨笑笑口話，市民好醒嘅，見你做到嘢，就會支持你，所以民望慢慢升。

卿姐同馬時亨講開浸大普通話試風波時，馬提到浸大有中醫學系，如果中醫生唔識普通話，好難喺內地同名醫交流。卿姐就突然講起「我哋都有個名醫叫何志平，可惜醫唔到自己」。馬時亨話何志平普通話唔錯，「𠵱家Patrick(何志平)都好慘，唔好取笑佢」。馬時亨透露，兩年前喺波蘭一個一帶一路會議上見過佢。何志平現遭美國執法部門扣查。