【明報專訊】環境保護署為宣傳「惜食香港」，創作咗隻「大嘥鬼」，喺facebook開專頁同市民分享惜食資訊同活動。專頁管理員好識玩，內容夠盞鬼又緊貼潮流，最新一則帖文借近期大熱嘅「旅蛙」宣傳「區區夠綠 2月好節目」。 帖文寫住：「最近有位新朋友嚟咗搵我啊，我梗係要帶佢周圍去啦，而且2月綠在區區有咁多好活動預備咗畀大家，不如你哋都一齊嚟啦！」附圖就係阿鬼走入旅蛙屋企同佢傾偈，問阿蛙「呢啲活動啱唔啱玩」，之後兩張圖顯示阿蛙手上拎住一份2月「區區夠綠」活動時間表同埋地點。 帖文幾個鐘已經有超過2000人畀反應，大讚阿鬼緊貼潮流。咁多人讚，阿鬼亦喺留言區化身「關公」多謝大家支持。有網民「錯焦點」問佢做乜一身綠色裝備，連頂帽都係綠色？阿鬼回答：「因為綠色代表環保。」做宣傳、搞形象嘅嘢，或者有網民講得啱，「天下公關，唯快不破」。
|
| |
| |
;){kind=small}
