【明報專訊】噚日大部分時間都掛起8號風球,唔少人都話星期日打風打亂放假活動,不過亦有唔少人照舊去飲茶睇戲,議員呢類活動亦無被打亂。實政圓桌立法會議員田北辰就喺facebook話,一早已安排街坊欣賞印度電影《打死不離3父女》,而街坊都風雨不改地去到戲院,有啲街坊更同佢講笑話,打風最好嘅節目就係睇戲。
睇戲取消無提示
莫乃光話要投訴
不過唔係所有人都咁好彩,資訊科技界議員莫乃光(Charles)就話,原本一早買咗兩張德國電影節戲飛,但去到電影資料館先知取消。Charles話網上賣飛嘅系統有個叫「溫馨提醒」嘅服務,早幾日已經電郵提醒佢買咗飛,不過打風就無「溫馨提醒」佢取消喎!
Charles話,就算一定要取消,噚日朝早8點幾已經掛起8號波,但套戲5點幾先開場,要「溫馨提醒」並唔難,又話唔知系統會唔會「溫馨提醒」點樣退款,佢仲想向業界代表、「體育、演藝、文化及出版界」議員馬逢國投訴一下𠻹。