【明報專訊】香港眾志秘書長黃之鋒因衝入政總東翼前地(俗稱公民廣場)案被改判即時入獄，佢爸爸黃偉明噚日接受商台訪問，形容個仔自細已經唔容易妥協、堅持信念，透露黃之鋒讀中學時，由於學校飯堂啲嘢「唔好食」，喺facebook設立專頁抗議，最後要見校長，當時自己同太太都好支持個仔，而呢次係佢印象中阿仔第一次關注公共事務。 黃偉明話，早前探監時帶咗「軟皮」封面嘅《聖經》畀黃之鋒，因為硬皮版帶唔到入去。黃偉明話，以前同阿仔參與遊行集會時，都教導佢要保持和平，唔好講人身攻擊嘅說話，形容個仔一直「好乖」，所以𠵱家有人話佢暴力係無可能嘅事。 批兩律師會聲明非理性分析 黃偉明亦再次批評上訴庭判辭，認為「如果你話(重奪公民廣場)個『奪』字都係暴力，我無嘢好講」，又形容如果人多就等於暴力，係「有無搞錯」。佢認為目前嘅檢控制度出現問題，批評屬於政治任命嘅律政司長可以獨大、凌駕所有嘢，同時形容兩個律師會早前發嘅聯合聲明，係「接近宗教迷信」而非理性分析，因為聲明係話畀市民聽「古往今來所有法官判案都係公正公平」。 民主黨立法會議員尹兆堅前日就去探社民連黃浩銘，佢話阿銘好硬淨，仲好關心時事，捉住阿尹傾房屋政策！阿銘仲提到經典電影《月黑高飛》(The Shawshank Redemption)，話要以電影中嘅人物為鑑，唔可以因為被囚就同社會脫節、約制思想喎。
|
| |
| |
