【明報專訊】立法會財委會噚日審議教育新資源時火花四濺，喺會議開咗大約5個鐘，主席陳健波(波哥)為會議「劃線」，限制議員作最後一輪發言，呢個時候有泛民要求加會，波哥就回應話，議員再搞落去，撥款就表決唔到，又寄語議員如果唔想教育界葉建源「心臟病發」，就唔好再拖延喇，意指葉建源好想撥款通過。 葉未反駁 波哥最終收番言論 波哥呢番說話引嚟民主派反彈，香港本土毛孟靜批評陳健波言論不當，話如果第日審議嘅係社福界撥款，係咪又會話社福界邵家臻心臟病發？波哥最終收回呢番說話，而葉建源全程未有反駁對方。工黨張超雄之後喺會上批評建制派唔肯加會，不過波哥似乎做足功課，即時反駁，話早前詢問議員加會意願時，張超雄都無贊成今日同聽日加會喎。 陳志全提資助負笈外國 建制即申報利益 教育新資源牽涉資助大專院校學生，人力陳志全噚日就突然提出修正案，要求政府研究可唔可以資助學生去埋外國讀書，波哥即安排表決以免阻延時間，但建制派「班長」廖長江即刻叫停，原因投票前要申報利益，話有子女喺外國讀書。金融界陳振英見到亦唔執輸，舉手作同樣申報利益。不過波哥就話，要唔要申報由大家自己決定，無硬性規定嘅。
|
| |
| |
;){kind=small}
