加考古元素 沙中線造價增41億 宋代古井融入土瓜灣站
[2017.07.15] 發表
【明報專訊】沙中線土瓜灣站2014年挖掘到宋元古井、陶瓷器碎片等大批古物，經過約3年時間，由港鐵委聘考古專家所寫嘅最終考古報告已經完成，古蹟辦已經接納。港鐵噚日話，為妥善保育出土遺蹟，會修改土瓜灣站嘅設計同施工方法，包括以「先拆除，後重置」方式保留車站中央位置嘅 J2古井。
港鐵話，為咗喺原先位置同水平重置J2古井及引水槽，已經重新設計車站頂蓋及預建混凝土井槽，令J2古井可融入車站，日後車站大堂會採用透明天花，令市民可以喺大堂向上仰視到古井。港鐵亦修改車站原先通風設施同機房設計，令位於車站西南面嘅J1古井同周邊嘅房基遺存可以原址保留。
保育遺蹟突顯地區歷史
除咗保育古井，港鐵亦計劃喺車站入面設置玻璃櫥窗，展示挖掘出來嘅陶瓷器碎片、錢幣同鐵塊等宋元古物，又會喺車站設計加入考古元素，突顯地區歷史。
考古報告結論亦指出，雖然有歷史文獻記載南宋最後兩個皇帝，即宋帝昰同宋帝昺，曾經喺九龍嘅官富場(官方鹽場)一帶居住幾個月，但今次並無發現任何遺蹟，直接證明兩個南宋皇帝喺嗰度居住過，亦都搵唔到臨時宮殿遺蹟。
不過呢項保育就造價不菲，港鐵話保育方案令沙中線工程造價最少增加41億元，但仲未交代成條沙中線造價要幾多錢埋單。
更多港聞
【明報專訊】噚日高等法院頒布裁決，羅冠聰、劉小麗、梁國雄、姚松炎喪失立法會議員資格，建制派議員紛紛表示歡迎，唔知係咪有建制派議員太過興奮，噚...
詳情
相關新聞
