新舊議員聚會黃宜弘單仲偕鬥劈酒
[2017.07.15] 發表
【明報專訊】立法會噚日舉行酒會，邀請前任議員返立法會，同現任議員敘舊，出席者包括前主席曾鈺成、民主黨李華明同單仲偕等前議員、前金融界議員吳亮星等。
有「酒仙」之稱嘅黃宜弘就帶烈酒助興，同單仲偕「劈」過。不過兩人酒量就高下立見，Emily見黃宜弘成23杯落肚都面不改色，但係5杯烈酒落肚嘅單仲偕行出宴會廳就面紅到似關公。
單仲偕叫乳鴿「再努力多啲」
不過單仲偕唔多飲得都情有可原，事關佢啱啱做完白內障手術，身體狀况麻麻。佢話，醫生預計佢明年初先可以完全恢復視力，自己退休大計都打亂晒，無得潛水，又無得滑雪。
對於新一屆立法會議員嘅表現，單仲偕就感嘆梁、游被DQ一事，話「選民選你出來，點會畀梁振英搞番轉頭 」。對於民主黨新人，佢就忠告「再努力多啲」，睇多啲文件、對政策研究要深入啲，唔知班乳鴿又聽唔聽得入耳？
卸任主席之後，曾鈺成噚日難得重返議會，同班議員、秘書處同事好好傾，留到最後遲遲唔走，一個個影晒相先離開。
曾鈺成耍手唔答DQ案
Emily本來想問下佢對DQ議員官司嘅睇法，不過作為前立法會主席，規則當然揸得好正，佢立即擺手話，立法會議事廳內唔接受得訪問。
更多港聞
相關新聞
