林超英憶保育黑臉琵鷺 20年前國際合作

林超英（後排左一）喺網誌分享，佢喺1997年6月去咗東京同各地人員開會，商討保育黑臉琵鷺。（林超英網誌「草雲居」）

【明報專訊】香港回歸20周年，前天文台長林超英喺佢個網誌「草雲居」分享，佢20年前嘅6月代表香港觀鳥會，喺東京參加有關保育黑臉琵鷺嘅國際會議，大家一齊為保育當年只得500隻、屬於「極度瀕危」級別嘅黑臉琵鷺出謀獻策，最初大家都無乜頭緒，但又覺得唔可以乜都唔做，於是就由了解問題開始，啟動咗之後持續多年嘅國際協作行動。

會議後冇耐，人造衛星追蹤實驗喺香港米埔展開，搵番黑臉琵鷺春夏天嘅繁殖地，然後喺內地、台灣、朝鮮和韓國執行多項跟進保育措施，結果國際協作奏效，黑臉琵鷺數字呈上升趨勢，到2017年增加到3000隻以上，令呢種原本走向絕種之路嘅物種脫離「極度瀕危」級別，成為近年國際上少有成功嘅保育行動。林超英話，自然保育係漫長工作，偶然見到自己投入嘅努力竟然成為成功個案嘅一部分，心裏面嘅喜悅足以推動繼續向前行。

林超英又話，有人話佢係「病態樂觀」，佢唔反對，因為佢見過茫無頭緒嘅難題，也可以喺劣勢下得到解決，黑臉琵鷺就是例子，所以佢相信只要目標正確，堅持加努力可以帶來成功。

更多港聞

「育鯤輪」 唔使人手畫海圖 今日起開放參觀

【明報專訊】慶祝回歸20年活動多不勝數，第一艘中國自行開發設計嘅專用遠洋實習船「育鯤輪」已經停泊喺海港城海運碼頭，今日開始開放畀公眾參觀，噚... 詳情