劉兆佳連出3本新書：封筆前想寫多本

全國港澳研究會副會長劉兆佳噚日舉行新書發布會兼研討會，話自己仲有一本書諗住寫，然後先考慮封筆，仲諗好埋題目，就係《思考一國兩制的未來》。（李紹昌攝）

【明報專訊】全國港澳研究會副會長劉兆佳最近一口氣出咗3本著作，噚日就搞咗個小型新書發布會兼研討會。以佳叔喺兩地嘅學術江湖地位，邀請到嘅嘉賓自然都好有分量，包括中聯辦法律部長王振民、基本法委員會委員陳弘毅，北大法學院教授饒戈平仲專程從北京嚟香港出席，認真好大面子。

佳叔今次3本新書包括《香港社會的民主與管治》、《香港人的政治心態》、《香港社會的政制改革》，3本大作收錄佳叔多年嘅學術文章。在場嘅學者都向佳叔大送高帽，個個開場都自稱係佳叔忠實讀者。

饒戈平就話，佳叔著作深受內地學界尊重，話佳叔由2002年起到𠵱家，已有9本書問世，可以話係高產作家，令人仰慕。王振民就大讚，感受到佳叔喺書中嘅家國情懷。

《思考一國兩制的未來》未落筆

佳叔總結時透露，本身打算封筆，不過都係發現仲有一本書想寫，就係《思考一國兩制的未來》。不過佢話，𠵱家仲未有把握落筆，叫出版社商務印書館千奇唔好畀壓力佢。