【明報專訊】立法會議員鄭松泰早前喺內委會提出動用權力及特權法，調查早前選舉事務處電腦失竊事宜，因有25票贊成、25票反對出現相同票數，主席李慧琼按照《議事規則》否決咗相關動議。當日泛民有3名議員都無去立法會投票，包括公民黨楊岳橋(Alvin)、民主黨涂謹申同許智峯。唔少網民要求問責，團體「八十後浪」更去信要求3人交代缺席原因。
Alvin噚日回覆該團體話，當日因處理家中老人嘅身後事，未能趕回立法會投下關鍵一票，望大家見諒。佢仲態度誠懇，承認自己有責任，當日已即時私下向鄭松泰道歉，以後亦會更小心安排會議事務。至於許智峯就解釋，自己當日就喺區議會遭箍頸一事到警署錄口供，走唔開。
鄭松泰擬大會再闖關
雖然第一次動議失敗，但鄭松泰預告打算再喺立法會大會直接提出，相信泛民今次應該唔夠膽再走開，Alvin都承諾公民黨必定會全員出席。
