【明報專訊】仲記得幾年前喺文化博物館舉行嘅畢加索畫展一票難求，事隔幾年，畢加索作品再次來港。今次嘅「畢加索與積琪蓮展覽」精選咗13幅積琪蓮(第二任妻子)嘅肖像畫作，全部都係第一次喺西班牙以外地方展出㗎。

首次西班牙以外展出

熟悉呢位西班牙國寶嘅人都知道，畢加索一生嘅創作唔少都同女人有關，最後一個情人積琪蓮更加成為佢嘅妻子。今次展覽唔可以錯過嘅就係《積琪蓮》油畫，呢幅係畢加索《宮女》系列中嘅作品之一。成個系列有58幅畫作，𠵱家收藏喺巴塞隆拿畢加索美術館。

其餘展出嘅12張版畫作品，都係1962年用油氈版技術製作，當中包括廣為認識嘅《戴帽拿著絨球和印刷罩衫的女人肖像》，係今次展覽另一個焦點。

另一個好消息係今次嘅畢加索畫展唔使撲飛，銅鑼灣時代廣場嘅Living Room Museum將會喺今個月26號(周日)至下個月21號朝十晚十免費展出。Emily噚日去睇過，畫作已經到咗香港，過幾日大家就可以去朝聖一番喇。