回應「一國兩制」信 林兆波：大家演繹啦

回應「一國兩制」信林兆波：大家演繹啦

[2017.02.16] 發表

【明報專訊】特首參選人林鄭月娥前日趁情人節放閃，喺facebook公開丈夫林兆波畀佢嘅情信，令到一向「潛水」嘅林生成為網民熱議對象。林兆波喺太太參選後鮮有公開現身，不過Emily噚日喺灣仔會展外就偶遇林生，佢當時拎住紫色小型行李袋，準備搬入林太已租住嘅灣仔服務式住宅會景閣。林兆波話，因為噚日係要搬離官邸嘅最後一日。

林兆波回應咗信中提到「一國兩制」，對於佢祝願老婆「為落實一國兩制作出貢獻」嘅意思，佢話「大家演繹啦」。至於封信係咪佢親自寫，林兆波停頓數秒後，指「我簽得名，梗係我寫啦」。被問到林太改變主意決定參選特首，林兆波話唔緊要，「隨遇而安」。至於流傳中聯辦游說選委支持林太，有無咩貼士畀太太等，佢無正面回應，本身係數學家嘅佢話「我淨係識純數」。

毛孟靜批林鄭用$2.9郵票寄信

林兆波明顯唔慣面對傳媒，佢進入大廈前，再三指自己只係普通人，拱手作揖希望大家「放過我啦」。

另外，林太噚日因為拉票信件惹非議。話說立法會議員毛孟靜前晚喺facebook上載林太寄畀選委爭取支持嘅信，見到信封上貼有2.9元嘅郵票。毛孟靜質疑呢封信只得兩張紙，信件唔可能超重，但郵票就貼2.9元，質疑林太日後點理財，認為佢「離地到不食人間煙火」。毛孟靜仲搵埋寄信嘅收費表，指小型信件30克內都係只需1.7元。