【明報專訊】一波未平一波又起，話說熱血公民立法會議員鄭松泰早前因「倒插國旗」行為遭建制派動議譴責，雖然調查委員會第一次會都未開，佢已有新危機，民建聯葛珮帆(EQ)擬喺下個禮拜五嘅內會上再提另一動議，譴責鄭松泰污衊懲教署。 事緣上個月初鄭松泰搞記招，指有懲教所囚犯疑受虐打入院，但最後警方經調查指囚犯只係因病入院。雖然懲教事務職員協會事後發聲明要求鄭松泰公開道歉，又去信立法會主席梁君彥要求喺議員利益申報委員會處理，不過主席最後拒絕咗。 向來撐警嘅EQ就擺上心，擬提譴責動議。EQ都話自己有諗過係咪小事化大，但覺得對方唔肯就此道歉或者澄清，唔可以縱容呢種情况再發生。佢有諮詢過部分黨友，指大家都支持佢嘅做法。 鄭松泰噚日回應稱，自己有責任監察政府施政，有人要借題發揮請便。不過佢話建制召開調查委員會反而幫咗自己，因為佢可以拎到病人同職員口供、懲教內部調查報告、警方調查證據，「我哋一齊揭開懲教呢個獨立王國有幾污糟好唔好？」
|
| |
| |
