【明報專訊】前晚(9日)網上流傳一張巨型柏靈頓熊(Paddington Bear)公仔嘅相，但熊仔似乎流落街頭無家可歸，之後仲被一個男人用槌仔將佢「毁容」。原來隻熊仔前日喺柴灣新翠商場做完聖誕展覽，網民見到都話好可惜，仲有網民質疑商場胡亂棄置垃圾。 商場噚日回覆Emily話，好似熊仔公仔等嘅展品，因為涉及商業版權，需要交畀合約承辦商，按既定程序處理清拆。商場發言人補充，前晚工作人員將公仔敲爛係銷毁公仔嘅其中一個步驟，之後就搵車運走熊仔，但就承認工作人員唔記得遮蓋展品，話日後可以改善程序。 張相畀人放上facebook群組「柴灣人柴灣事」，版主梁詠詩認為今次事件造成「雙輸」，「隻熊最終要被丟棄去堆填區，街坊覺得可惜之餘，一定會對商場產生負面感覺」，佢建議商場同版權持有人商量，令展品可以喺社區中心或學校展覽，提高街坊同商場嘅互動。
|
| |
| |
