【明報專訊】立法會一開波已經開戰，青年新政梁頌恆、游蕙禎下個禮拜能唔能夠宣誓，仍然有唔少變數。不過政圈有口痕友已討論緊，如果兩個議員被取消資格，下一步就係引發新界東同九龍西補選，仲有人心思思估緊咩人選最有機會跑出。

方國珊：已使晒「棺材本」

睇返9月立法會選舉，喺新界東飲恨嘅包括方國珊、新同盟范國威、工聯會鄧家彪等。不過搶唔到尾席嘅方國珊，早排已講明自己使晒「棺材本」，之前參選係「最後一搏」。范國威就話，𠵱家問補選問題係太早，佢會留意事態發展。

建制派中亦有花生友提議，應該畀工聯會鄧家彪(阿Bill)出戰。不過阿Bill就一笑置之，話即使政府司法覆核贏咗，都會有人繼續上訴，認為呢啲牽涉《基本法》嘅官司，免不了打兩三年。不過佢就話，自己仲係工聯會一分子，唔會歸隱，叫大家放心。

黃毓民未言「重出江湖」否

九龍西方面，有人就估些微差距輸畀游蕙禎嘅「教主」黃毓民最有機會「重出江湖」。但毓民就無回應Emily有無興趣出選。不過，𠵱家宣誓風波睇怕有排搞，仲有本民前梁天琦選舉呈請做緊，睇怕補選呢單嘢都只係講住先。