【明報專訊】噚日香港受「海馬」影響,日頭大部分時間都掛8號風球,唔少市民都留喺家中,立法會議員梁繼昌(Kenneth)都唔例外。但佢噚日朝早喺屋企焗蛋糕嗰陣,焗爐發生小爆炸,玻璃碎爆到一地都係,最慘係連入面嘅蛋糕都報銷埋。
Kenneth話,呢個焗爐已經用咗幾年,係德國貨,仲要星期一先有人嚟維修過。佢講笑咁話,颱風都未打到嚟,點知自己就差啲畀焗爐嘅小爆炸炸死。早排三星手機Note 7發生連串爆炸事故,就有網友問Kenneth係咪放咗部三星Note 7入去先搞到爆炸。
睇佢貼上facebook嘅相見到,爆炸後屋企地下有好多玻璃碎,焗爐入面仲有個焗模。Kenneth講笑咁話,唔使勞煩法律界議員郭榮鏗幫佢點算損失,都已經知道焗爐入面嘅香蕉蛋糕一定報銷咗。