王永平教CY陣營反擊 「曾鈺成」變「惡臭一幫人」

王永平教CY陣營反擊「曾鈺成」變「惡臭一幫人」

[2016.07.19] 發表

【明報專訊】立法會主席曾鈺成呢期鍾意玩英文文字遊戲anagram，將特首梁振英嘅英文名重新拼合成「HUGELY CUNNING(非常狡猾)」，公務員事務局前局長王永平嘅《am730》專欄都湊熱鬧，笑梁特首身邊嘅人可能真係料子有限，「不懂得以其人之道還治其人之身」，佢話大可以將曾主席嘅英文名「TSANG YOK SING」拼成「SO STINKY GANG」，意思係「非常惡臭的一幫人」。

王永平話，或者有人會講，曾鈺成係一個人，唔係一幫人，但佢話曾鈺成係民建聯創黨主席，其言行肯定得到唔少黨友支持，所以指曾鈺成代表一幫人並無不妥。王永平又話，曾主席日前接受傳媒訪問時話，每日都有人勸佢選特首，佢都難免心動；王永平指普羅市民無資格投票選特首，但都可以幻想一下，假如要喺「HUGELY CUNNING」同「SO STINKY GANG」之間選擇，「會否像英文諺語說的between the devil and the deep blue sea」，意思大概係進退兩難。