卿姐上《晚吹》扮葉劉喊 細路催著吊帶裙

卿姐上《晚吹》扮葉劉喊細路催著吊帶裙

[2016.07.08] 發表

【明報專訊】立法會換屆在即，表明唔會再選嘅民主黨主席劉慧卿(卿姐)，早前上ViuTV錄影節目《晚吹：一大一路》，同一班小朋友分享多年從政心得。卿姐為咗逗佢哋開心，開新民黨主席葉劉淑儀玩笑，扮對方上年政改「甩轆」後接受電台訪問時啜泣，卿姐首先哀嚎一聲，然後七情上面話「我真係好想投票呀」，唔使參選果然可以豁出去。

卿姐曾承諾卸任前會著番幾十年前嘅吊帶裙，有小朋友「追數」，仲建議「𠵱家」或者「聽日」著，卿姐就話未得咁快，但強調卸任前都會著嘅。卿姐解釋政策時，有兩個小朋友大膽唔聽書，一個玩手機，一個瞌眼瞓，卿姐見狀就問：「你覺得我講啲嘢，你好無興趣聽呀？」

有小朋友問佢政黨成日鬧交，點解無人改善？卿姐就回應話，政改否決後搵過立法會主席曾鈺成，「聽過未呀？聽過曾鈺成未呀？」，當時叫主席向政府同建制派提出喺民生議題合作，但主席其後接受報章訪問，就向外界講無人支持卿姐建議。有小朋友喺節目後形容，卿姐好多嘢講、好激動，「每條問題都要10分鐘先講完」。