【明報專訊】明哥(陳灼明)位於深水埗大南街嘅副店「北河同行(深水埗)」噚日終於開張，仲派咗200個「海鮮飯盒」畀基層街坊。明哥今年3月因為業主大幅加租而無奈結業，好彩得到新業主謝林幫助，以較低租金出租逾千呎地方，又有一班好心人支援，明哥話新店會請區內兩名更新人士同兩名殘疾人士，畀佢哋服務社會；又計劃喺元朗開飯堂，幫吓南亞裔人士。

昨派200個龍躉鮮蝦飯盒

明哥同一班義工，噚晚喺通州街天橋底向露宿者同街坊派咗200個有龍躉同鮮蝦嘅飯盒，咁好餸皆因佢得到「龍躉大王」吳伯恩贊助咗一條40至50斤「靚龍躉」，以龍躉市價成192蚊一斤，今次吳伯恩就贊助近萬元。原來吳先生同明哥識咗成30年，佢欣賞明哥大公無私，「只要明哥有需要就一定會幫」。

噚日排隊等攞曲奇、水果同飯券嘅唔少都係長者，3點幾先開始派，但唔少人兩點已經冒住太陽同微雨排隊，超過600份心意好快派晒。60歲嘅尹先生對明哥派飯義舉感到開心，佢話平日都係買「十蚊五份菜」，排咗個幾鐘先攞到飯盒，都覺值得。但亦有長者對排隊安排表現鼓譟，話「大熱天時排咁耐先換得一餐飯無價值」。

明哥話新店會維持22蚊三餸飯，希望發展成現代式社企自負盈虧，等街坊可以用好平嘅價錢食到一餐飯；佢又希望北河(明哥)慈善基金有限公司可於短期內申請成為非牟利團體公開籌款。明哥話自己心腸軟，鍾意幫人，「要放喺慈善嘅肥料入面先可以開花結果」。

明哥話，新舖營業時間係上午5點到下午4點半，關門之後預計每個禮拜安排1至3日，各向露宿者同獨居長者派發150至300個飯盒。