【明報專訊】民主黨同熱血公民有不少牙齒印，熱血公民亦不時狙擊批評民主黨。有線電視節目《政壇單打》就搵咗有意出選九龍東立法會直選嘅熱血公民黃洋達，同民主黨立法會議員胡志偉辯論，二人就政治領袖責任唇槍舌劍。黃洋達話熱血公民喺以往抗爭行動中，有責任帶領示威者安然離場，保護佢哋。但胡志偉即篤爆，指摘黃洋達鼓動群眾後「自己就匿埋」，斥責黃無政治抗爭道德，「連最基本嘅人格都無」。有網民就話黃畀胡志偉KO咗。 黃洋達解釋，每個人喺抗爭中能夠承擔嘅後果都唔同，佢要做嘅係保護群眾，「梗係走啦，大佬，做咩要畀佢(警察)拉？」黃洋達又批評胡志偉喺抗爭中留守，等待警方拘捕，係連累其他示威者被捕。 胡志偉反駁，話作為政治領袖要承擔責任，指摘熱血公民鼓動群眾犯法，自己就匿埋，然後就「話畀人聽『我就唔拉得嘅』」。佢批評黃：「你作為一個政治領袖，你企喺後面？作為政治領袖連最基本嘅人格都無。」黃洋達就話胡志偉言論「完全係戾橫折曲」。 至於熱血公民喺過去嘅選舉都「狙擊泛民」，被指係「民建聯B隊」，黃形容呢個講法無聊。
|
| |
| |
