怪醫拉布要毓民教路 唔熟議事規則 代主席馬逢國亂龍

怪醫拉布要毓民教路唔熟議事規則代主席馬逢國亂龍

[2016.06.30] 發表

【明報專訊】立法會本來仲有3次大會就即將順利收爐，但噚日因《2016年醫生註冊(修訂)條例草案》又搞到硝煙再起。有「怪醫」之稱、平日甚少出現喺立法會嘅醫學界議員梁家騮，噚日終於「神勇」一次，瘋狂打鐘點人數拖延會議，仲搞到流會收場。不過佢明顯唔多熟議事規則，噚日會上連提「中止待續」都要問吓主席幾時提得，梁家騮笑言自己係「拉布實習生」，所以走去請教拉開布嘅黃毓民。

拉布新手梁家騮唔熟書都「情有可原」，但噚日連主持會議嘅代主席馬逢國都烏瀡瀡。

話說梁家騮提出要「中止待續」後就坐低咗，唔知自己要就住議案繼續發言解釋原因，馬逢國不單止無提醒佢，仲跟住叫食衛局長高永文起身發言回應，次序搞亂晒。最清醒嘅係黃毓民，即時走去同議會秘書講番正常程序，連自由黨田北俊都忍唔住講笑話應該叫毓民做立法會主席。

肚屙留守陳健波捱義氣

梁家騮處女拉布處處「甩轆」，但已搞到政府好緊張，事關工業總會名譽會長劉展灝設靈，唔少建制派傍晚去咗殯儀館致意，令流會機率激增。食衛局政治助理陳凱欣噚日全日喺議事廳做「狗仔隊」，捉住議員入去開會。不過每次都等到幾乎14多分鐘先夠人，認真危，因為15分鐘唔夠35人開會就流會。

其實保險界陳健波最夠義氣，噚日病到七彩，肚屙咗7、8次，都堅持留守立法會，本來諗住晚黑8點散會先去睇醫生，但噚日黃昏流會，佢可以早啲返屋企休息。