大輝問政府﹕點解CY唔得市民支持？

[2016.06.16] 發表

【明報專訊】立法會議員林大輝向來都好多金句，噚日佢喺立法會會議上，問特首梁振英(CY)係咪打算任期內都唔再落區、放棄同泛民議員溝通，以及點解得唔到市民支持。雖然問題明顯針對CY，但代佢答嘅係署理政制及內地事務局長陳岳鵬，答案一如所料只係官式回應，話特首不時同地區人士互動，喺理性對話等基礎上會積極同各議員溝通，又會爭取市民信任同支持。

大輝聽完呢啲答案當然唔滿意，批評係答非所問、政府故意迴避問題，仲話相信即使換幾多個特首同局長，都唔會解決到香港嘅問題，換晒700萬市民就可能得，又形容政府唔解決問題，只會無藥可救、死路一條。陳岳鵬回應話，政府會一如既往同各界溝通、講政策，努力爭取支持。

話換晒700萬人先得芸姨﹕咁你唔走？

不過民建聯蔣麗芸就唔滿意大輝咁批評政府，發言時話政府同各界有溝通當然係好事，但溝通唔到都無辦法，批評大輝講到要700萬市民換晒先解決到問題，「咁你又唔走？」佢相信大輝唔走都係因為香港生活幾好，可以住大屋、揸靚車。

泛民當然亦借機批評CY，民主黨涂謹申就問，CY曾公開講要「shout at them」、「vote them out」，質疑呢個就係CY同泛民溝通嘅方法。民主黨主席劉慧卿亦批評，CY點解要叫官員杯葛自由黨同民主黨嘅黨慶。陳岳鵬只能回應話，選民點投票，政府充分尊重，但佢唔想具體評論事件，又話官員出席咩活動，係因應日程去考慮喎。