【明報專訊】有謂「分久必合」，人民力量同社民連當年因為意見不合分道揚鑣，不過立法會選舉在即，面對本土派來勢洶洶，人力同社民連噚日就宣布組成「人社選舉聯盟」，呢個聯盟以「敢抗命、堅抗爭」做口號，計劃喺9月合推6張名單參選，其中陳志全(慢必)同梁國雄(長毛)雙雙喺新界東競逐連任，陳偉業(大嚿)就幫黃浩銘抬轎，出戰新界西。 慢必長毛新界東爭連任 唔少學者分析，本土派興起會令激進泛民流失選票，不過，社民連主席吳文遠否認「人社」結盟係因為擔心本土派分薄票源，話唔相信本土派可以攞到人社嘅票。至於人社將來會唔會合併呢？吳文遠無正面回應，只係話過咗選舉先算喎。 另一邊廂，慢必就承認本土派興起對激進泛民有大影響，但相信同長毛再戰新東唔會「兩敗俱傷」，因為有選民轉投本土派嘅同時，亦會有溫和泛民轉為支持人社，形容自己過去4年喺議會「唔係白坐」，估計會吸納到新選票。 人社喺聯合綱領提到必須支持中國民主運動，咁擔唔擔心流失部分年輕人選票呢？慢必話相信中港兩地民主息息相關，又舉例話港人雖然改變唔到位處中東嘅伊拉克，但「唔通講世界和平都唔啱？」 人社打算派6張名單參選，但大嚿噚日就擺烏龍，帶頭嗌口號時話人社要攞「五區五席」，結果其他支持者即刻打晒手勢，提醒佢仲差一席，大嚿隨即笑住講聲對唔住，修正番口號。不過，Emily相信如果人社真係贏到5席，佢哋都應該會好滿意喇。
|
| |
| |
;){kind=small}
;){kind=small}
