財爺引拳王阿里講核心價值

[2016.06.13] 發表

【明報專訊】財政司長曾俊華噚日寫網誌，借早前逝世嘅拳王阿里(Muhammad Ali)推動民權同種族平等嘅故事，以及自己細個住喺紐約時，對當年美國社會種族之間嘅矛盾感受，去講香港嘅核心價值。財爺話無論嚟自邊度嘅人，無論佢哋係移民，定係回流香港嘅人，只要鍾愛香港多元包容嘅文化，尊重認同香港核心價值，大家都可以喺香港搵到發展機會。

自喻拳迷嘅財爺話，阿里除咗憑精湛拳術震撼世界各地人心，仲有佢推動民權和種族平等，以及反戰嘅信念。財爺話阿里曾公開拒絕服役參與越戰，被判監禁同被罰褫奪拳王頭銜，但阿里堅持信念無屈服，最終重返拳壇並再度成為世界冠軍，話阿里追求和平嘅遠大理想有劃時代意義。

曾居紐約種族矛盾感受深

財爺話喺阿里首奪拳王寶座後一年，就同家人搬去紐約住，當時好多鄰居都係生活比較窮困嘅拉丁裔移民，中國移民嘅社會地位亦唔高，因此對當年美國社會種族之間嘅矛盾感受好深。財爺話香港同紐約一樣，都係移民城市，雖然各人擁有唔同嘅文化、方言、信仰同習慣，但都能夠搵到適合自己嘅生活方式，相信大家都喺香港落地生根，視香港為家，為社會出一分力，「這也許就是我們作為國際都會的真正魅力所在」。