【明報專訊】平日不時有關於特首梁振英(CY)嘅民調公布，話愈年輕嘅市民愈不滿CY，不過新聞統籌專員馮煒光撰文反駁，話CY近年同無數年輕人互動，「年輕人見到梁振英時都顯得高興」，大家仲可以平和理性討論社會同政治問題。佢話聽大學生講過：「見過CY後，印象完全改觀。」 啱啱續約一年嘅馮煒光喺《頭條日報》專欄話，CY上任後「禮賓府特別忙」，因為有大學生去同CY秉燭夜談：談國家，談政改，談港獨；亦有幾百個中學生去禮賓府同CY交流惜食。另外，CY平日外訪都會帶20個大學生同行，「有其他香港或外地首長經常這樣做嗎？」 馮煒光仲話，呢啲活動都有相片同錄像發放，但部分傳媒由於政治立場，「封鎖這些真相，繼續營造年輕人反對梁的負面形象」。佢亦批評關於官員支持度嘅民調「結果出了大誤差」，但「民調機構不解釋，繼續封自己為權威」，指目前係政治立場決定讀者睇到咩，「這樣下去，社會會繼續大範圍誤判」。
|
| |
| |
