「立竿無影」7月9日可體驗

[2016.06.04] 發表

【明報專訊】四字詞語「立竿見影」聽得多，意思係辦事之後好快就見到成效，Emily噚日睇天文台嘅冷知識短片又學到新嘢，原來香港今年會有兩個日子指定時刻，出現「立竿無影」嘅情况，即係直立係路面上嘅物件，喺太陽照射之下會睇唔到個影。

天文台氣象冷知識環節講，喺每年夏至，北回歸線範圍，中午時候太陽會直射物件頭頂，例如地面上面直立嘅竹竿，嗰一刻個影係會冇咗，造成「立竿無影」現象，由於香港喺北回歸線以南，立竿無影唔會出現喺夏至，而係夏至前後嘅日子。一年有兩次畀太陽直射嘅機會，其中一個日子同時間係噚日中午12時21分，另一個就係7月9號中午12時29分，有興趣做立竿無影測試嘅朋友，記低日子，下月做個實驗試吓啦。