膠鴨仔 紙公仔 回憶返晒嚟 買懷舊玩具郵票 送膠劍仔

膠鴨仔紙公仔回憶返晒嚟買懷舊玩具郵票送膠劍仔

[2016.05.25] 發表

【明報專訊】有番「咁上下年紀」、又玩過「膠劍仔」嘅你，要留意喇！香港郵政噚日宣布推出以「香港玩具——1940至1960年代」為題嘅特別郵票同集郵品，重現6款經典玩具，畀市民重拾童年回憶。值得留意嘅係，除咗郵票，另外推出一款內附3套郵票嘅小版張同兩款紀念套摺，紀念套摺內附一套膠劍仔(見圖)或紙公仔。嘩，坐喺Emily隔籬嘅男同事都話超吸引，真係童年回憶即時返晒嚟呀。

附玩具紀念套摺$75 6月8日起售

今次嘅郵票表面仲用咗亮漆印刷效果，營造懷舊感，一套6張郵票賣18.6元；6款郵票面值1.7元至5元不等。有興趣嘅市民，今日可以先去各郵政局購買價值1.2元嘅首日封；至於各款附有玩具紀念套摺，以及小全張等郵品，會於6月8日起發售，其中紀念套摺售75元。

紀念1940至1960年代玩具

上一代物質匱乏，唔似得𠵱家一人一部手機，那年代，幾張「公仔紙」、幾件膠玩具已經好珍貴。其實香港玩具製造業由1940年代開始，1960年代風雲一時，同電子業、紡織業同塑膠業被稱為「香港四大工業」。

6款郵票分別有膠鎚仔、紙公仔、水槍、膠劍仔、黃膠鴨同埋鐵皮青蛙，呢啲玩意已經買少見少。其中嘅膠劍仔當年深受男生歡迎——每袋玩具有多種色彩繽紛嘅「兵器」，玩法係「對戰雙方」各將一件兵器放喺地上或枱上，然後以移、推、彈等方法移動兵器，壓住對方嘅兵器就算贏，並可將對方兵器據為己有！

另留意，各集郵局今日至5月31日期間，接受預約自備封蓋銷服務。詳情可瀏覽網址(

www.hongkongpoststamps.hk/chi/newsletter/2016/05/20160509a.htm)。

更多港聞