許智峯12萬公帑變花紅 分3助理

許智峯12萬公帑變花紅分3助理

[2016.05.25] 發表

【明報專訊】每逢選舉時節總會有各種黑材料出現，有意出選港島立法會嘅民主黨中西區區議員許智峯噚日就玩自爆。許智峯(圖)話去年用咗約12萬公帑去分花紅畀3個助理，每人分到3.9萬，其中有助理平日只係兼職幫手，月薪大約得2000蚊，換言之，許智峯申請政府撥款向助理勁派相等於20個月薪金嘅花紅。

打算留住助理一人最後轉工

許智峯話，本來打算分花紅去留住助理，可惜3.9萬嘅花紅都無法挽留其中一人，有一個助理拎完花紅後就轉投政府工。現時區議員每年都會獲得大約40萬元嘅實報實銷津貼，可以用嚟租辦事處、支付平日雜費營運開支，以及聘用助理。每年嘅津貼如果用唔晒，可以將餘額撥入下一個年度，儲到當屆區議員任期屆滿。

一兼職助理月薪2000元

許智峯解釋，3個助理只有1個係全職，月薪約1.1萬，已經幫手兩年；另外兩個都係兼職助理，一個負責擔擔抬抬嘅工作，另一人負責政策研究。前者幫咗佢4年，月薪2500元；後者得2000元，只係幫咗佢5個月，最終都辭職。許智峯話，當初低薪請人係怕津貼唔夠使，點知最後有錢剩，所以就拎嚟做花紅去留住助理。佢話決定花紅金額時有同助理討論，金額反映能力同年資。

許智峯又話，通常其他區議員會拎筆錢去印月曆、環保袋，但亦問過區議會秘書處，有議員也會拎錢派花紅，不過金額就唔知。

更多港聞