「香港應該要個好啲嘅特首」 教聯蔡若蓮擬「獨立」選立會
[2016.05.21] 發表
【明報專訊】立法會教育界功能組別議席一直係親泛民嘅教協「囊中物」，親建制人士每次對撼都無功而還。教聯會副主席蔡若蓮(圖右)噚日開記招，話最遲6月底宣布係咪參選，話自己屬於「中間派」，即使參選都係用獨立身分，唔會用教聯牌頭，但呢個階段就爭取緊教聯會員支持。為咗選舉可以去到幾盡？蔡就突顯自己「中間」，大膽評論特首選舉，話「香港應該要個好啲嘅特首」，要民望高同勤政愛民！咦，唔知CY有冇呢兩個條件呢？至於點睇CY連任，蔡就收斂番啲，耍太極話「相信冇最好，只有更好」。
欣賞特首勤力 指溝通要改善
講到近年教育，蔡批評制度過時，教育局無諗教育方向，「嗱，真係要鬧局長，佢一日未落台，一日都要佢做嘢」，被問點睇吳克儉連任局長，佢即時帶住詫異表情講，「我睇唔到有咩理由要佢做多屆喎」。講完局長又點少得講埋特首，蔡話「欣賞特首勤力做到嘢」，不過溝通能力有改進空間，仲話「特首係香港嘅CEO，香港現時情况，特首責無旁貸」。
籲勿標籤左校出身：唔好乜都政治
蔡若蓮做過教育局高級學校發展主任、課程發展處高級課程主任，𠵱家係福建中學(小西灣)校長，加上教聯背景，唔多唔少都有啲建制味，蔡叫大家唔好因為福建中學係「左校」而將佢標籤做某一派別，話會視乎教育議題決定「企邊一邊」。蔡又話今次係教育信念之爭，「唔好乜都政治」。另外，教協宣布打算派副會長葉建源角逐連任，蔡若蓮話嚟緊除咗尋求教聯支持，仲會搵埋友好嘅教評會支持。
更多港聞
【明報專訊】政界早前傳出，經民聯梁君彥（Andrew）將接棒曾鈺成做下屆立法會主席，不過佢做內會主席嘅處事手法，就一直畀泛民質疑偏頗。噚日喺...
詳情
東九現「特首要變」橫額 Paul：多謝二次創作口號可重見天日
【明報專訊】「香港須改，特首要變」橫額重現九東！有「西環契仔」之稱嘅立法會議員謝偉俊（Paul），早排喺街頭掛呢個「要變」嘅橫額，橫額無耐就... 詳情
【明報專訊】行政會議成員陳智思，多年來都被視為特首黑馬人選，雖然外表好健康，但其實佢18歲證實患上血管收縮病症高安氏動脈炎，做過多次手術，初...
詳情
相關新聞
