【明報專訊】特首梁振英(CY)早前捲入行李風波，被質疑有無濫權。本身係人大代表嘅新民黨立法會議員田北辰噚日就話，如果梁振英係普選產生，行李事件就唔會發生，因為梁振英會考慮社會觀感喎。 田北辰噚日喺電台節目上話，社會上嘅「港獨」、「自決」、「驅蝗行動」同「不滿」，全部源於唔滿意政治架構中，「政府揸fit超然地位呢個人」，佢話市民無辦法左右1200個選委點樣選出特首，令到市民覺得「特首係同我哋無關」，「撐梁振英就話佢做得好，希望繼續連任，唔鍾意(梁振英)嗰啲呢，就唯有去教堂祈禱㗎啫」，所以佢覺得有必要重啟政改。 批佔中浪費政改機會 佢話呀，如果特首由普選產生，就會更願意聆聽民意，「逼住要聽你，要畀合理回應」，所以如果有普選，機場事件就唔會發生。不過，田北辰就批評，前年佔領運動浪費咗政改千載難逢嘅機會，搞到明年大家都無得投票選特首。
|
| |
| |
