【明報專訊】港台《城市論壇》噚日討論電影《十年》，立法會議員梁美芬話，佢覺得《十年》只係單方面嘅政治宣傳電影，「我期待嘅《十年》，可能係有學生係踩roller返學呀，又或者有未來感覺」。

梁美芬又唔滿意《十年》中單元《本地蛋》有一段小朋友戴住紅領巾嘅情節。佢話感覺係導演想將對上世紀文革嘅恐懼反映出來，「係好out、outdated(過時)。」佢話，《十年》應該要多角度反映社會情况，例如示威者「追打警察」或自焚者以外嘅沉默大多數。

舒琪：帶住主觀睇戲唔成熟

同場嘅香港演藝學院電影電視學院院長舒琪就話，如果一個觀眾帶住主觀去睇電影，係反映觀眾嘅唔成熟。佢舉例，「𠵱家睇舒淇嘅戲，仲以為係睇性感嘅場面，咁必定會失望」，對於梁美芬話最初以為《十年》係科幻片，舒琪笑說「係我第一次聽到最科幻嘅說法」。

《本地蛋》導演伍嘉良就話，電影本身應該好多元化，「唔一定要拍學生踩roller返學」，佢強調唔係鼓吹自焚。佢話電影係想用香港人過去嘅經歷去表達佢哋唔想見到嘅將來，「有提唔代表鼓吹，咁樣對《十年》不公平」。

梁美芬就話期望日後會出現一套「反斗十年」，可以加入幽默元素，「政圈十年後會變成點」。