協調立選 民協邀青政之鋒坐低傾

協調立選民協邀青政之鋒坐低傾

[2016.04.06] 發表

【明報專訊】港大法律系副教授戴耀廷早前提出「雷動計劃」，叫泛民協調爭取立法會過半數議席，不過泛民反應唔太熱烈，唯一明確表態支持計劃嘅民協，主席莫嘉嫻噚日就牽紅線，發信邀請各個泛民政黨坐低傾，青年新政同前學民思潮召集人黃之鋒籌組嘅新政黨同樣係獲邀對象。民協又唔排除將來會搵本土派傾，收集各方意見。

主席莫嘉嫻：唔介意犧牲

協調當然會有犧牲，莫嘉嫻話如果民調顯示民協要讓步，民協會尊重計劃，「唔介意犧牲」，但如果協調之下，民協全部名單都出唔到呢？莫嘉嫻就笑稱，相信最少都出到一席嘅。對於戴耀廷提出「雷霆救兵」、即係由選民協調，莫嘉嫻話相信對方係做兩手準備，唔係放棄政黨政團協調，但覺得由選民協調有風險，因難保選民投票意向，所以都係由政黨政團協調最直截了當。

莫嘉嫻承認過往選舉要做協調有難度，但認為既然上年區議會選舉做到，相信今年9月立法會選舉都可以。對於會唔會應約同民協傾，青年新政召集人梁頌恒就賣關子，話有關立法會選舉嘅各樣安排會喺月內公布。而至噚日截稿時黃之鋒未回應Emily嘅查詢。