【明報專訊】自由黨榮譽主席田北俊(田少)一向唔支持特首梁振英(CY)連任，田少噚日更進一步，將自己參唔參選立法會押喺對方身上，話自己喺立法會一直扮演「和諧」角色，如果有信息話梁振英唔競逐連任，由財爺曾俊華出選，社會已經可以和諧，咁自己9月就唔準備出選立法會，否則就要再思考咁話。 話若財爺出選 社會已可和諧 田少噚日接受商台節目《在晴朗的一天出發》訪問，被問到如果梁振英連任，係咪代表有人想「一國兩制」延續唔到呢？田少形容係「非常陰謀嘅陰謀論」，但認為如果中央唔肯搵一個處事比較和諧嘅特首，咁「你呢個問題就啱，點解搵咁樣嘅人做行政長官，繼續令香港唔和諧？」田少又話，自由黨表明唔支持梁振英連任，相信有呢個諗法嘅建制派選民會因此投票畀佢哋，亦可以吸納中間泛民選票。
|
| |
| |
