【明報專訊】政府新聞網facebook早前發文，呼籲大家踴躍參加「名繫啟德坊行人專用街道命名比賽」，撞啱當時發生銅鑼灣書店事件，有人就留言不如改名為「銅鑼灣五子喺邊道」，旋即惹來其他網民有樣學樣瘋狂洗版改名。事隔兩個月，昨日終於公布得獎名單，包括傲翔路、天際路、啟航路同破浪路等，主辦嘅土木工程拓展署將以此作為日後命名參考。 得獎作包括「傲翔路」「啟航路」 土木署長鍾錦華主持頒獎典禮時話，今次比賽收到超過900份作品，參賽者不但配合啟德以前同未來嘅發展主題，包括航空同航海特色，亦有宣揚獅子山下同舟共濟精神。啲街名好正路，不過難得政府新聞網fb再接再厲，不但喺fb發帖公布消息，更加押晒韻咁寫咗段字恭喜得獎者，「唔理對路唔對路，巴絲留言夠地道，發揮創意考思路，比賽結果喺呢道」。 政府新聞網fb毋懼洗版帖文，網民當然唔放過機會，紛紛繼續以自創街道洗版，例如「返大陸唔洗用E道」同埋「李波去邊道」等，但留言人數明顯較上次少，亦有網民讚冠軍街名改得幾好。不過Emily就覺得，唔叫翱翔路而叫傲翔路，唔知係寫錯字定係別有深意？
|
| |
| |
;){kind=small}
