【明報專訊】打「中港區隔」旗號出選立會新東補選嘅本土民主前線梁天琦，佢嘅非香港出生背景近日喺網上備受討論，熱議點先算係「香港人」。一直主張「源頭減人」，即係減少新移民來港嘅新民主同盟譚凱邦，噚日亦加入戰團，話自己由始至終都認為最基本嘅本土，係認同大幅減少單程證配額，甚至取消單程證，而「源頭減人」係最能顧及本土利益，一來避免「溝淡人口」，二來可以減慢生活空間被收窄咁話。 不過，譚凱邦話「本土論述」去到個人層面就唔同講法，如有人喺內地出生，但從小來港接受教育，然後投身社運，「今天有梁(天琦)同學，之後可能有陳同學、李同學，似乎我又不太覺得有任何壞處」。以上講法有無前後矛盾？就要看官判斷喇。 另一邊廂，梁天琦噚日喺facebook換咗動畫人物做頭像，圖片配以「畀我抖吓得唔得」嘅字幕，唔知係近日謝票身心俱疲，定係見到網上連日爭論「血統論」，開始攰呢？
|
| |
| |
