【明報專訊】學民思潮召集人黃之鋒、學聯前秘書長周永康同現任秘書長羅冠聰，因為前年9月26日衝入公民廣場被控。審訊噚日踏入第5日，單案9點半開審，但係黃之鋒一直遲遲未見人，最後遲咗25分鐘先到東區裁判法院，所以畀官奶奶話咗幾句。 原本應該9點30分開庭嘅聆訊，因為黃之鋒遲到搞到9點55分先開庭。代表黃之鋒嘅資深大律師駱應淦就向裁判官解釋，話黃之鋒住海怡半島，因為香港仔隧道塞車所以遲到。裁判官張天雁叫黃之鋒企起身，同佢講知道無可能完全預料交通情况，但做大事嘅人應該預多啲時間，又話佢遲到25分鐘「係好多」，浪費咗好多人嘅時間，希望佢嚴正對待呢件事，下次唔好再犯，黃之鋒回應「完全明白」。 官話做大事嘅人應預多啲時間 雖然黃之鋒無正式向法庭道歉，不過Emily相信佢咁大個人，要全個庭嘅人等佢，佢都應該知道唔好意思嘅。
|
| |
| |
