【明報專訊】農曆新年立法會休會，立法會會計界議員梁繼昌(Kenneth)就趁假期睇咗6、7套電影，情人節晚上就入場捧周星馳睇《美人魚》，但佢竟然話當晚係丟低太太去睇戲。不過，Kenneth都補鑊話，情人節有留喺屋企同老婆煮飯仔，夜晚先出街睇10點場喎。Kenneth話呢套賀歲片都算唔錯，至於王晶嘅《賭城風雲III》，Kenneth就話無睇，好厚道咁話「算啦」！

Kenneth話佢經常都會睇獨腳戲，但唔認自己係「毒男」，仲指住拍檔、資訊科技界議員莫乃光(Charles)，話Charles其實都成日一個人去睇戲。

佢哋兩個噚日搞傳媒團拜，一如往年親自下廚炮製美食，Kenneth及Charles分別整咗「意式香草燒肉」及「秘製玫瑰豉油雞」。Charles話去買雞先知雞貴，兩隻雞用咗400多元。佢又話兩隻雞用同一煲汁料做，但味道有別，第二隻雞有BBQ味，其實即係火力太大，豉油燒焦咗囉！

「金剛箍」送政府 盼施政有規矩

適逢猴年，Kenneth話向梁振英政府送上「金剛箍」道具，希望其施政有規有矩，並尊重立法會。Charles就祝願大家猴年如意，話見到旺角發生嘅衝突事件，大家都唔開心，社會各方都有責任令到香港事事如意。